ଏହି ପୃଷ୍ଠାଟି ବୈଧ ହୋଇସାରିଛି
ଗାନ୍ଧିନୀଜ କାଣ୍ଡ ଘଟାଇଲା ଦିନୁ
ସ୍ନେହଗଣ୍ଠି ହେଲା ଶିଥିଳ,
ତହୁଁ ଜଣାଗଲା କିସ ହେଲ ତୁମ୍ଭେ
ତହିଁ ପୂର୍ବେ ଅବା କି ଥିଲ;
ପାଞ୍ଚାଳେ, ପରିଚୟ ହେଲା ଯାହାର,
ଯାହା ଲାଗି ହେଲା ସକଳ କଳହ
ମାନ ବଢ଼ାଇଲ ତାହାର ।
ଗାନ୍ଧିୀଜ କଷ୍ଟ ଗଣନା ନ କରି
ବନ୍ଦି ପୁର କଲେ ଗମନ,
କାନ ନ ପାତିଲ ଦୂରେ ଥାଇ କଲୁଁ
ଯେତେ ହାହାକାର କ୍ରନ୍ଦନ;
ଜଗତେ, କୀରତିର ବାନା ଉଡ଼ିଲା,
ପାର ନିଆଁ ମେଣ୍ଟି କଉଶଳ ବଳେ
ଉଗ୍ରସେନାନନ୍ଦ ବଢ଼ିଲା ।
ପରେ ଜଣାଗଲା ତୁମ୍ଭ ଆମ୍ଭ ଭେଦ
ତୁମ୍ଭେ ଦ୍ୱୀପାନ୍ତରନିବାସୀ,
ବାଲ୍ୟଜୀବନରେ ଆମ୍ଭର ଧନରେ
ବଢ଼ିବା ପାଇଁ ଥିଲ ଆସି;
ଗୋପେନ୍ଦ୍ର, ତୁମ୍ଭେ ହେଲ ବିଶ୍ୱବିଖ୍ୟାତ
ଆମ୍ଭ ସଙ୍ଗେ ଏକ ବେଭାରେ ଚଳିଲେ
ହେଉଛି ଏବେ ଲାଜ ଜାତ ।
ଡାକି ତ ନଥିଲୁଁ ତୁମ୍ଭ ଘରେ ଯାଇ
ଆସିଥିଲ ନିଜ ଲାଭରେ,
ସରଳ-ହୃଦୟ ମଣି ସିନା ଘରେ
ରଖିଲୁଁ ଅତି ସ୍ନେହାଦରେ,
ଗୋପେନ୍ଦ୍ର, କହିବ କଲ ଉପକାର,
ଯାହା କରିଅଛ ନିଜ ସ୍ୱାର୍ଥପାଇଁ
ନ ଥିଲା ଆମ୍ଭ ଦରକାର ।