ଉଇକିପାଠାଗାର:କର୍ମଶାଳା/କିପରି କରିବେ

କିପରି କରିବେ

ଏହି ପୃଷ୍ଠାଟି ଉଇକିପାଠାଗାର କର୍ମଶାଳା ଆୟୋଜନ କରିବାକୁ ଚାହୁଁଥିବା ଉଇକିଆଳିଙ୍କ ପାଇଁ ତିଆରି କରାଯାଇଛି । ଏଥିରେ ବିଭିନ୍ନ ଶିକ୍ଷଣ ଓ ବୈଷୟିକ ବିଷୟରୁ ଆୟୋଜକ ଉଇକିଆଳି ଶିଖିପାରିବେ ।

କର୍ମଶାଳା ପାଇଁ ପ୍ରସ୍ତୁତି:

କର୍ମଶାଳା କରିବା ଆଗରୁ ଆଗ୍ରହୀ ଯୋଗଦାନକାରୀଙ୍କ ପୂରାନାମ, ଇମେଲ, ଫୋନ ନମ୍ବର ଆଦି ଏକ ବ୍ୟକ୍ତିଗତ ଫର୍ମରେ ସଂଗ୍ରହ କରନ୍ତୁ ।
କର୍ମଶାଳାର ଦିନେ/ଦୁଇ ଦିନ ଆଗରୁ ସେମାନଙ୍କୁ ଇମେଲ ଯୋଗେ ଯୋଗାଯୋଗ କରନ୍ତୁ । ଇମେଲରେ କେବଳ ସ୍ଥାନ ଓ ସମୟ ନ ଦେଇ ଉଇକିପାଠାଗାର ବାବଦରେ କିଛି ସଂକ୍ଷିପ୍ତ ସୂଚନା ଦିଅନ୍ତୁ । ଏଥି ସହିତ http://bitly. com/joinwikisourceରେ ଯାଇ ନାମ ଲେଖାଇବା ପାଇଁ ଲିଙ୍କଟିଏ ସେ ଇମେଲରେ ଦିଅନ୍ତୁ ।
ଯୋଗଦାନକାରୀଙ୍କ ସଂଖ୍ୟା ୧୦-୨୦ ଭିତରେ ଥିଲେ ସେମାନଙ୍କୁ ତାଙ୍କ ପରିଚୟ ଓ ଆଗ୍ରହ ବାବଦରେ ପଚାରି ବୁଝନ୍ତୁ । ସେମାନେ ବସି/ଠିଆ ହୋଇ ନିଜ ବାବଦରେ ବଖାଣିପାରିବେ । ସେମାନଙ୍କ ପସନ୍ଦ-ଅପସନ୍ଦ ଆଗୁଆ ଜାଣିଲେ ସେହି ଅନୁସାରେ କର୍ମଶାଳାଟିକୁ ପରିଚାଳନା କରିପାରିବେ ।

କର୍ମଶାଳା ପରିଚାଳନା:

କର୍ମଶାଳାଟିକୁ ଶ୍ରୋତା-ବକ୍ତା ଭଳି ନ କରି ବରଂବେଶୀ ଆଲୋଚନା ପ୍ରକାରର କରନ୍ତୁ ।
ଅନେକ ଲୋକ ମନ୍ତବ୍ୟ ଦେବକୁ ପସନ୍ଦ କରନ୍ତି । ତାଙ୍କ ପାଇଁ ଆଗୁଆ ଏମିତି କିଛି ପ୍ରଶ୍ନ ତିଆରି କରି ଯାଇଥାନ୍ତୁ, ଯଥା:

୧. ଓଡ଼ିଆରେ ପ୍ରଥମ ଛପା ବହି କଣ ଓ ତାହା କେବେ ଛପା ହେଲା? (ଉତ୍ତର: ୧୮୦୭ରେ ଆରମ୍ଭ ହୋଇ ୧୮୦୯ରେ ଶେଷ ହୋଇଥିବା ବାଇବେଲର ନିଉ ଟେଷ୍ଟାମେଣ୍ଟ । ଏହା ଏବେର ପଶ୍ଚିମ ବଙ୍ଗଳାର ଶିରାମପୁର ପ୍ରେସରେ ଛପା ହୋଇଥିଲା ।)
୨. କେଉଁ  ମସିହାରେ ଓଡ଼ିଆକୁ ଶାସ୍ତ୍ରୀୟ ଭାଷାର ମାନ୍ୟତା ମିଳିଲା? (ଉତ୍ତର: ୨୦୧୪ ମସିହା ଫେବୃଆରୀ ୨୦ ତାରିଖ)

ପ୍ରଶ୍ନ ପଚରା ଉଚୁରା ସେମାନଙ୍କୁ ଆପଣଙ୍କ ସହ ବେଶି ପରିଚିତ କରାଇବ । ଆପଣ ଏହି ଗୋଟିଏ କର୍ମଶାଳାରେ ସେମାନଙ୍କୁ କେତେ ଜଣାଇ ପାରିବେ ତା' ଯେତେ ଗୁରୁତ୍ତ୍ୱପୂର୍ଣ୍ଣ ନୁହେଁ ତା'ଠୁ ବେଶି ଗୁରୁତ୍ତ୍ୱପୂର୍ଣ୍ଣ ହେଲା ଆପଣ ସେମାନଙ୍କୁ କେତେ ସାଙ୍ଗ ହୋଇପାରୁଛନ୍ତି । ସେମାନଙ୍କ ସହ ମିତ ହେଲେ ପରେ ଧୀରେ ଧୀରେ ସେମାନଙ୍କୁ ଅଧିକ କଠିନ ବିଷୟମାନ ଶିଖାଇପାରିବେ ।
ଯୁଗେ ଯୁଗେ ଗପର ଆଦର ରହିଛି । କାରଣ ଲୋକେ ନିରସିଆ ଭାଷଣ ଅପେକ୍ଷା କାହାଣୀ ଭଳି ଜିନିଷରେ ବେଶୀ ଆଗ୍ରହ ଦେଖାନ୍ତି । ଏଇ ମାନସିକତାର ଲାଭ ଉଠାନ୍ତୁ । ସେମାନଙ୍କ ଆଗରେ ବିଭିନ୍ନ ଅସୁବିଧା ଠିଆ କରାନ୍ତୁ । ଆଉ ସେମାନଙ୍କୁ ସମୟ ଦିଅନ୍ତୁ ସେଗୁଡ଼ିକର ସମାଧାନ କରିବା ପାଇଁ । କିଛି ଉଦାହରଣ ତଳେ ଦିଆଗଲା ।

ଆମର ପ୍ରକାଶନ ଆରମ୍ଭ ହେଲାଣି ୧୮୦୭ ମସିହାରୁ । ଭାବନ୍ତୁ ଥରେ କେତେ ବହି ଏ ଭିତରେ ଛପା ଯାଇନଥିବ । ତା' ଭିତରୁ କେତେ ଆପଣ ଦରକାର ବେଳେ ଲାଇବ୍ରେରି ଯାଇ ଖୋଜିପାରିବେ?
୨୦୦୭ ମସିହା ବେଳକୁ ଓଡ଼ିଆ ଭାଷା ଭାଷୀ ଲୋକଙ୍କ ସଂଖ୍ୟା ସାଢ଼େ ତିନି କୋଟି । ଏଥିରେ ଅନେକ ଓଡ଼ିଶା ବାହାରେ । ସେମାନଙ୍କ ହାତପାହାନ୍ତାରେ ଲାଇବ୍ରେରି ବି ନାହିଁ । କେମିତି ପାଇବେ ସେମାନେ ବହିଟିଏ? ମାଣବସା ହେଉ କି ଭାଗବତ ହେଉ, ଘରେ ଛପା ବହିଟିଏ ନ ଥିଲେ ଲୋଡ଼ା ପଡ଼ିଲେ ଆପଣ କେମିତି ପାଇବେ ବହି? ଆପଣ ନିଜେ ଏମିତି ଓଡ଼ିଆ ବହି ଇଣ୍ଟରନେଟରେ ଖୋଜନ୍ତି କି?

ସମ୍ବାଦ, ସମାଜ, ଧରିତ୍ରୀ ଆଦି ସବୁଠାରୁ ଅଧିକ ପଠିତ ଓଡ଼ିଆ ଖବରକାଗଜ ଏବେବି ତାଙ୍କ ୱେବସାଇଟରେ ଇଉନିକୋଡ଼ରେ ଲେଖା ଦିଅନ୍ତି ନାହିଁ । ଇଉନିକୋଡ଼ ନ ହେଲେ ଇଣ୍ଟରନେଟରେ ଖୋଜିଲେ ଲେଖାସବୁ ମିଳିବ ନାହିଁ । ଧରନ୍ତୁ ଆପଣ ଅମୁକ ଦିନରେ ବାହାରିଥିବା ସମୁକ ଲେଖା ପଢ଼ିବାକୁ ଚାହାନ୍ତି । ଇଉନିକୋଡ଼ ହୋଇନଥିଲେ ଲେଖାର ଶିରୋନାମ ଇଣ୍ଟରନେଟରେ ଖୋଜି ଖବରଟିକୁ ପାଇପାରିବେ ନାହିଁ ।
ଓଡ଼ିଶା ସରକାରଙ୍କ ମୁଖ୍ୟ ସାଇଟ ଓ ବାକି ଅନେକ ସାଇଟରେ ଓଡ଼ିଆରେ ଲେଖା ନାହିଁ । ଏପରିକି ଉତ୍କଳ ପ୍ରସଙ୍ଗ ଭଳି ଜଣାଶୁଣା ପତ୍ରିକା ମଧ୍ୟ ଅଣ-ଇଉନିକୋଡ଼ ଲେଖାରେ ପ୍ରକାଶିତ ।
୧୯୫୫ ଆଗର ପ୍ରାୟ ବହି କପିରାଇଟ ବାହାରେ । ଆଉ ସେଥିରୁ ଅନେକ ବହି ଧୀରେ ଧୀରେ ନଷ୍ଟ ହୋ ଇଯାଉଛନ୍ତି । ସେଗୁଡ଼ିକର ସୁରକ୍ଷା ହେବ କିପରି?
୧୮୫୦-୧୯୫୦ ଭିତରେ ବାହାରୁଥିବା ବିଭିନ୍ନ ଓଡ଼ିଆ ପତ୍ରପତ୍ରିକା, ୨୫ ଗୋଟି ଅଭିଧାନ ଓ ଆଉ ଅନେକ ବହି ମିଶାଇ ଦେଢ଼ ଲକ୍ଷ ପାଖାପାଖି ପୃଷ୍ଠା ସୃଜନିକା ଅନୁଷ୍ଠାନ ଦ୍ୱାରା ସ୍କାନ କରାଯାଇଛି । ହେଲେ ଏ ବିରାଟ ସମ୍ପତ୍ତି ମଧ୍ୟ ଇଣ୍ଟରନେଟରେ ଖୋଜି ପାଇବା କଷ୍ଟ ।
ଏକ ବହିର ଅଧ୍ୟାୟ ନାମ କି ଶବ୍ଦଟିଏ ବି ଖୋଜିଲେ ତାକୁ ଖୋଜିପାଇବାର ଏକ ମାତ୍ର ବାଟ ହେଲା ଇଉନିକୋଡ଼ । ଏଣୁ ଆଗରୁ ବହିକୁ ସ୍କାନ କରି ଇଣ୍ଟରନେଟରେ ରଖିବାର ବାଟ ଥିଲେ ହେଁ ଉଇକିପାଠାଗାର ଦେଇ ବହିକୁ ଡିଜିଟାଇଜ କରିବାର ବାଟ ଖୋଲିଲା ।

ଉଇକିପାଠାଗାର ବାବଦରେ:

ଏବେ ଆସିଲା ଯୋଗଦାନକାରୀଙ୍କୁ କିଛି ଜଣାଇବାର ପାଳି । ପ୍ରଥମେ ଆଗରୁ ବଖାଣିଥିବା ପ୍ରତିଟି ଅସୁବିଧାର ସମାଧାନ ଗୋଟେ ଗୋଟେ କରି ଜଣାନ୍ତୁ ।
ଛପା ବହିକୁ ସ୍କାନ କରିବା ହେଲା ପ୍ରଥମ ସୋପାନ । ତା' ପର ସୋପାନ ହେଲା ତାକୁ ଡିଜିଟାଇଜ କରିବା ।
ବହିଟି ସ୍କାନ କରି ତିଆରି କରାଯାଇଥିଲେ ଅପଲୋଡ଼ ହେଲା ପରେ ତାହାକୁ ଅପ୍ଟିକାଲ କ୍ୟାରେକ୍ଟର ରେକଗନେସନ (OCR) ବ୍ୟବହାର କରି ସ୍କାନ ଛବିରୁ ଲେଖା ବାହାର କରିହେବ ।
ବହିଟିର PDF ଟାଇପସେଟରେ ତିଆରି ହୋଇଥିଲେ ଲେଖାକୁ କନଭର୍ଟର ବ୍ୟବହାର କରି ଇଉନିକୋଡ଼ରେ ରୂପାନ୍ତର କରିହେବ ।

କର୍ମଶାଳା ପରର କାମ:

କର୍ମଶାଳା ପରର ସମୟ ଅତି ଗୁରୁତ୍ତ୍ୱପୂର୍ଣ୍ଣ । କର୍ମଶାଳାରେ ଭାଗ ନେଇଥିବା ନୂଆ ଉଇକିଆଳିଙ୍କ ଭିତରେ ଉତ୍ସାହ ଭରିରହିଥିବ। ଆଉ ସେ ବେଳ ହେଉଛି ତାଙ୍କୁ ବିଭିନ୍ନ ବାଟରେ ଆହୁରି ଉତ୍ସାହିତ କରିବା । ତାଙ୍କ ଲିଖିତ ବହି ବାବଦରେ ସୋସିଆଲ ମିଡ଼ିଆରେ ଲେଖିବାଠୁ ତାଙ୍କୁ ବାକି ଉଇକିଆଳିଙ୍କ ସହ ପରିଚିତ କରାଇବା କିମ୍ବା ତାଙ୍କୁ ବ୍ୟକ୍ତିଗତ ଭାବେ ଲେଖା ପାଇଁ ବାହାବା ଦେବାର ନିହାତି ଆବଶ୍ୟକ ରହିଛି । ନୂଆ ଉଇକିଆଳିଏ ଉଇକିପାଠାଗାରର ଆଲୋଚନା ପୃଷ୍ଠା ସହ ପରିଚିତ ହେବାକୁ ଟିକେ ସମୟ ନିଅନ୍ତି । ତେଣୁ ଉଭୟ ସୋସିଆଲ ମିଡ଼ିଆ ଓ ଆଲୋଚନା ସଭାର ବ୍ୟବହାର ଜରୁରୀ ।