ଏହି ପୃଷ୍ଠାଟି ବୈଧ ହୋଇସାରିଛି
ଗୃହଲକ୍ଷ୍ମୀ କରି ରଖିବି ବାମାକୁ
ହେବ ଯଦି ତାର ମତ,
ନ ହେଲେ ଜୀବନ ଯାପିବି ହୋଇ ତା
ଗୁପତ ପ୍ରଣୟେ ରତ ।
କେବେ ଦରଶନ ନେଉଥିବି ତାର
ସୁରମ୍ୟ ନିକୁଞ୍ଜ ବନେ,
ହୃଦାଚଳ-ତାପ ଶାନ୍ତ କରୁଥିବି
ତା' ତନୁଘନାଲିଙ୍ଗନେ ।
ଢାଳି ଦେଉଥିବ ତହିଁ କୃପାମୟୀ
ଅନୁକମ୍ପା-ସୁଧାଝରି,
ଇନ୍ଦ୍ରପଦେ ପାଦ ଦେଉଥିବି ତାହା
ପାନରେ ପରାଣ ଭରି ।
ଅଟ୍ଟାଳୀ ଉପରେ ଥାଇ କେବେ ମୋତେ
ଦେଖି ଦେଉଥିବ ହସି,
ସ୍ୱର୍ଗସୁଖ ରାଶି ଆସି ତେବେ ମୋର
ହାତେ ପଡ଼ୁଥିବ ଖସି ।
ନିଭୃତ କକ୍ଷରେ ଭେଟି କେବେ ଅବା
ଚିବୁକ ଚୁମ୍ବିବି ତାର,
ପ୍ରେମ-ବିସ୍ଫାରିତ ଶ୍ରୀମୁଖ-କମଳ
ଦେଖୁଥିବି ବାରମ୍ବାର ।
ରମଣୀମଣିର ଈପ୍ସିତସାଧନେ
ହୋଇଥିବି ସଦା ରତ,
ପ୍ରୀତି-ବ୍ରତତୀର ପ୍ରୀତିସମ୍ପାଦନ
କରିବି ଜୀବନବ୍ରତ ।
ଆମ ଗଙ୍ଗାଧର . ୬୯